თემებში არსებული პრობლემების ადგილზე გაცნობის მიზნით, მესტიის მუნიციპალიტეტის საკრებულოს წევრები ქალბატონები შორენა ცინდელიანი და მაია ხორგუანი ბატონ გოგა გელოვანთან ერთად შეხვდნენ ხაიშისა და იდლიანის მოსახლეობას. დეპუტატებმა დაათვალიერეს იდლიანის ადმინისტრაციული შენობა, ბაგა-ბაღი, ამბულატორია და სკოლა, რომელიც ძალიან სავალალო მდგომარეობაშია. პედ. კოლექტივმა საკრებულოს წევრებს მიმართეს თხოვნით ეშუამდგომლათ განათლების სამინისტროსთან აღნიშნულ საკითხთან დაკავშირებით. სოფელს აქვს ასევე გზის პრობლემა, რაც განსაკუთრებით რთულდება ზამთრის პერიოდში. სოფელი საჭიროებს ცენტრალურ გზასთან დამაკავშირებელი ხიდის მშენებლობას, რაც 6 კმ-ით შეამცირებს გზას იდლიანიდან ცენტრალურ ტრასამდე.
საკრებულოს წევრებმა დაათვალიერეს ხაიშის საჯარო სკოლაც, რომელიც ასევე საჭიროებს რემონტს, კარების შეძენას და სხვა სამუშაოებს (სკოლის სამივე შესასვლელი უკაროდაა დარჩენილი), რაზეც დეპუტატები მათ დახმარებას დაპირდნენ.
სოფელი ვედის მოსახლეობა ითხოვს დახმარებას სატელეფონო ანძების ან გამაძლიერებელ-მიმღები მოწყობილობის დამონტაჟებაში. ვედის მოსახლეობა დღემდე ვერ სარგებლობს მობილური ტელეფონებით.
,,ჩვენ ყველაფერს ვიღონებთ იმისთვის, რომ აღნიშნულ და სხვა პრობლემებთან დაკავშირებით იყოს შესაბამისი რეაგირება"- განაცხადეს საკრებულოს წევრებმა.
საკრებულოს წევრების მხრიდან მსგავსი ტიპის შეხვედრები მოსახლეობასთან რეგულარულ რეჟიმში გაგრძელდება.