საქართველოს დამოუკიდებლობის დღე მესტიაში

29 მაისი, 2019

25-26 მაისს, მესტიის მუნიციპალიტეტში, საქართველოს დამოუკიდებლობის დღე, რეგიონული განვითარებისა და ინფრასტრუქტურის სამინისტროს, ტურიზმის ეროვნული ადმინისტრაციისა და მთის კურორტების განვითარების კომპანიის, ასევე მესტიის მუნიციპალიტეტის ადგილობრივი თვითმართველობის ორგანიზებით, განსაკუთრებული სადღესასწაულო ღონისძიებებით აღინიშნა.
დამოუკიდებლობის დღისადმი მიძღვნილ გრანდიოზულ ღონისძიებას წინ უძღოდა კიდევ ერთი უმნიშვნელოვანესი მოვლენა- ლეო ფილფანის სახელობის თეატრისა და კინოს სახლის გახსნა მესტიაში. 
დამოუკიდებლობის დღესთან დაკავშირებით, თეთნულდის მთაზე გაიმართა ამ დღისადმი მიძღვნილი სათხილამური ტურნირი, სადაც გულშემატკივრებსა და მთის სტუმრებს დახვდათ განსაკუთრებული სადღესასწაულო გარემო და გასართობი პროგრამა, ტურნირის გამარჯვებულები კი საღამოს, კონცერტის მსვლელობისას დაჯილდოვდნენ.
ორი დღის განმავლობაში მესტიას სტუმრობდა უამრავი დამსვენებელი. ჰეშკილის მთაზე მოწყობილი იქნა კემპინგი და ფერადი კარვები, მოსასვენებელი სივრცე, გასართობი აქტივობები ბავშვებისა და მოზარდებისთვის, სხვადასხვა სახის შეჯიბრი, თამაშები და კარაოკე, ასევე ამ დღისთვის სპეციალურად მოწყობილი „ჰეშკილის ცის საქანელა“. სასიამოვნო დღის დასასრულს სეტის მოედანზე, ქართული, ნაციონალურ-რეგიონალური მუსიკალური ჯგუფის „კახაბერი და ხანუმები“-ს კონცერტი გაიმართა.
26 მაისს სეტის მოედანზე მთელი დღის განმავლობაში მიმდინარეობდა სხვადასხვა გასართობ შემეცნებითი თუ სპორტული ღონისძიებები, შეჯიბრი მკლავჭიდში, ჭადრაკში, ნარდსა და კლდეზე ცოცვაში, თეატრალიზებული საბავშვო წარმოდგენა და ფოლკლორული კონცერტი.
საღამოს, საქართველოს ჰიმნის ერთობლივი შესრულების შემდეგ, ღონისძიება გრანდიოზული ფოიერვერკებით დასრულდა.

გააზიარე